انفلونزا الطيور  ( من قبل 3 أعضاء ) قيّم
ويتحرك الفلاح وإبن الرومي في اتجاه بيت الفلاح لتناول الملوخية بالأرانب , وفي الطريق يلاحظا المخبرين يراقبون حركاتهم وسكناتهم فينزعج إبن الرومي -إبن الرومي : يعني أنا طفشت من ولاد الكلب زمان وماكانش في مخبرين , ألاقي عندكم المعتوهين دول ? -الفلاح : ملعون أبو المخبرين والي مشغلينهم , تعال ياعم ادخل البيت , ده انت حتدوق ملوخية ماحصلتش من البت شربات , دي فنانه بالأكل ويدخلا البيت , ويرى الفلاح مخبراً ينظر من خلف الشباك , فيركض باتجاه الشباك ويغلقه ويصرخ -الفلاح : يا ولية يا شربات , فين الأكل ده ابن الرومي مشرفنا النهارده , أهلا أهلا بيك ياحبيبي -شربات : دقيقة واحدة يا مرسي والأكل حيكون عندكم .... إنما ملوخية حتاكل صوابعك وراها -إبن الرومي : بس إنت لاحظت حاجه يا مرسي , الواد العقاد كان وطني بجدارة ورغم كده حاربوه , يعني صحيح هوه قاسي شوية , لكنو كان على حق دايماً وما يسكتش عالباطل , وما سلمش من لساناتهم , تفتكر ليه يا مرسي ? يعني الناس عاوزين حد زي أحمد شوقي بيتمسح بالخديوي , ولا الناس كده بتتبع دايما القصر , وما بتشغلش مخها , أنا والله عاتب على ناس من الزمن ده ولسه بيتكلمو على العقاد , وخصوصي العم يحيى اللي ما قراش حاجه للعقاد من خوفو من الخطورة -الفلاح : خوفو ولا خفرع !! إحنا جعانين ......وآدي الأكل ياسيدي ..إيه ده ياولية ? دي ملوخية من غير أرانب ? فين الأرانب يا شربات انطقي يا مجنونة ! -شربات : إنتا عارف يامرسي انفلونزا الطيور اللي طالعين فيها اليومين دول عشان يشغلونا -الفلاح : يا مجنونه الأرانب مش من جنس الطيور -شربات : عارفه يا مرسي , بس الناس كلها بتشتري أرانب , ولازملك واسطه عشان تاخد أرنب تطبخو , يعني الأرنب اليومين دول أغلى من بني آدم , قلت لنفسي خلاص أطبخها من غير أرانب !! -إبن الرومي : خلاص يا مرسي حناكلها من غير أرانب , ده البطران عيشتو قطران -الفلاح : يللا بسم الله , يعني لو الأمور رايقه أكتر حجبلك كازوزة بعد الأكل تروق فيها وتنعنش -إبن الرومي : ما ينفعش بعد الأكل , خليها بالليل , يمكن يكونو المخبرين نامو والليل ستر يا مرسي -الفلاح : إنت عارف دول مش حينامو , دول عدلو القوانين عشان يراقبونا , وقال إيه خمسه وسبعين بالميه صوتو مع التعديل , شوف يعني عاوزين يضربو عصفورين بحجر : تعديل وديمقراطية !! -إبن الرومي : عصفورين إيه يامرسي ? إنت نسيت انفلونزا الطيور ?? | 
